Zec 4 | NdeIBE | STEP | Ingilosi eyayikhuluma lami yabuya njalo yazangivusa njengomuntu evuswa ebuthongweni.

Zechariah 4

Uluthi Lwesibane Lwegolide Lezihlahla Ze-oliva Ezimbili

1 Ingilosi eyayikhuluma lami yabuya njalo yazangivusa njengomuntu evuswa ebuthongweni. 2 Yangibuza yathi, “Ubonani na?” Ngaphendula ngathi, “Ngibona uluthi lwesibane olwenziwe ngokugcweleyo ngegolide, lulomganu phezulu lezibane eziyisikhombisa lezimbobo zezibane eziyisikhombisa. 3 Njalo kulezihlahla zama-oliva ezimbili eduze kwalo, esinye ngakwesokunene komganu, esinye kwesokhohlo.”

4 Ngayibuza ingilosi eyayikhuluma lami, ngathi, “Kuyini lokhu, nkosi yami?”

5 Yaphendula yathi, “Kawukwazi ukuthi yizinto bani lezi?” Ngathi, “Hatshi, nkosi yami.”

6 Yasisithi kimi, “Nanti ilizwi lami kuZerubhabheli: ‘Hatshi ngempi kumbe ngamandla, kodwa ngoMoya wami,’ kutsho uJehova uSomandla.

7 “Uvele uyini, wena ntaba engakaya? KuZerubhabheli uzakuba ngumhlabathi owendlalekileyo. Khonapho usezaletha ilitshe lokuphetha abantu bememeza besithi, “Nkulunkulu libusise! Nkulunkulu libusise!”

8 Kwasekufika ilizwi likaJehova kimi lisithi:

9 “Izandla zikaZerubhabheli zisibekile isisekelo saleli ithempeli; izandla zakhe zizaliqedisa ukulakha. Ngakho lizakwazi ukuthi uJehova uSomandla ungithumile kini.

10 “Ngubani oludelelayo usuku lwezinto ezincane na? Abantu bazathokoza sebebona intambo yokuqondisa esandleni sikaZerubhabheli. “(Yizo ezingamehlo ayisikhombisa kaJehova, agcwala umhlaba wonke.)”

11 Ngasengiyibuza ingilosi, ngathi, “Lezi-ke izihlahla ezimbili zama-oliva kwesokunene lakwesokhohlo phezu koluthi lwesibane ngezani?”

12 Ngayibuza futhi ngathi, “Amahlumela la amabili e-oliva eceleni kwezinti ezimbili zegolide okumpompoza kuzo amafutha aligolide zona ziyini?”

13 Yaphendula yathi, “Kawuzazi ukuthi ziyini na?” Ngathi, “Hatshi, nkosi yami.”

14 Yasisithi, “Laba yibo ababili abagcotshiweyo ukukhonza iNkosi yomhlaba wonke.”